華富邨除咗係香港其中一條最早期又好有代表性嘅公共屋邨之外，仲有一條好多傳聞嘅瀑布，佢就係瀑布灣。瀑布灣位於瀑布灣公園內，亦係南區海濱長廊嘅其中一段，而瀑布嘅水源原自薄扶林水塘，亦有「扶林飛瀑」之稱。
提提你
1. 瀑布灣有好多傳聞同鬼故故事，當中最出名嘅鬼故當然就係白衣女子啦！其實有咁多傳聞，主要都係想嚇吓啲小朋友，因為瀑布灣曾發生多次溺斃嘅事故，所以大家郊遊時，記住要小心安全，唔好喺溪澗游水
2. 大家記住保持環境清潔，自己垃圾自己帶走，絕對唔可以破壞大自然環境
3. 瀑布外嘅瀑布公園設有公眾洗手間，方便遊客
前往方法
1. 乘坐往華富邨嘅巴士，喺華富（一）商場沿瀑布灣道往下行，就會到達瀑布灣公園
2. 瀑布灣公園設有收費露天停車場，自駕人士可以泊喺呢度，夠晒方便
香港名稱由來
作為東亞最重要嘅港口，以前有唔少商船都會停留瀑布灣避風同取用食水，並稱此處為香江。
香港八景
早喺清朝嘉慶初年，《新安縣志》就將瀑布灣選為「新安八景」；喺1940年前亦被記載為「香港八景」之一。直至1963年薄扶林水塘落成，自此瀑布就失去昔日壯觀嘅情景。雖然我哋冇機會見到以前氣勢磅礡嘅瀑布，但反而有一種清幽嘅感覺。
