想食異國風嘅餐廳，唔一定要去尖沙咀諾士佛臺、中環蘇豪區嘅，屬於住宅區嘅屯門都有好推介！今日喺屯門友愛體育館打完羽毛球，就近嘅搵食地點，當然唔少得御海灣啦！位於御海灣嘅OLYMPOS Restaurant & Bar主打土耳其菜，餐廳除咗室內部份之外，更設室外座位，打完波飲番杯，更可以盡訴心中情呀！
魷魚圈
即叫即炸，外皮炸到脆卜卜 ，炸粉嘅份量啱啱好！魷魚雖然炸過但仍然保持水份同彈牙感，加埋甜酸醬一齊食，非常開胃，絕對係一道唔錯嘅佐酒小食。
印度奶油雞、蒜蓉印度薄餅
奶油雞用上無骨雞，啖啖肉之餘配合濃酥嘅奶油汁，再加上非常掛汁而且煙韌嘅印度薄餅，風味十足。
雜錦海鮮薄餅
Pizza上嘅莫薩里拉芝士之間佈滿大蝦、魷魚同青口。減膩嘅火箭菜及紅洋蔥令本嚟油膩嘅pizza帶有一份清新感覺。鬆脆嘅餅底加上拉絲芝士，簡直食唔停唔口呀！
