聖誕節除咗食聖誕大餐，睇燈飾絕對係另一指定活動！尖東海旁、灣仔海旁同西九文化區都係香港睇燈飾嘅熱門地點，想唔洗迫就影到靚相，又或者想一次過就睇晒3區嘅燈飾，都唔係無辦法！天星海港遊推出聖誕限定版嘅維港遊，90分鐘帶你睇晒維港兩岸嘅燈飾，船上仲有LiveMusic，氣氛一流呀！
聖誕天星海港遊
今次為我哋提供服務嘅船叫「世星輪」，世星輪嘅聖誕天星海港遊喺19:30啓航後，大家就可以喺維港中心欣賞兩岸璀璨耀眼嘅聖誕燈飾，最佳嘅觀賞位置當然係露天甲舨啦！航程中會經過西九文化區巨型聖誕樹、M+博物館之巨型屏幕同尖東海濱長廊等地方，絕對要瘋狂打卡呀！喺船度睇燈飾最正係唔洗迫就影到靚相，加上LiveMusic，真係充滿節日氣氛又夠晒浪漫呀！
天星海港遊
喺1999年天星小輪就被《國家地理旅遊雜誌》列為「人生50個必到景點之一」！如果想細味維港，慢慢咁欣賞兩岸景色，天星海港遊就更加適合，一個小時嘅航程，可以不停打卡影相，其實香港真係好靚呀！
世星觀光輪
原來世星本身係往返灣仔同紅磡航線，經過改裝之後，成為全港第一艘由柴油發電同電能推動嘅低排放環保渡輪。世星載客量為408人，分為上下兩層，下層保留原本天星小輪嘅面貌，仲設有洗手間；至於上層就分為室內同室外兩部份，室外可以270度全景睇維港景色，而室內就有天幕玻璃，加上梳化軟座，好豪華好舒服架！
