當初相遇時回頭在笑 灣仔Yakitori Kobako

61

近排日劇《初戀》大熱,睇到我嘅初戀感覺返晒嚟,真係好想唱一句:當初相遇時回頭在笑…!除咗戀愛嘅感覺,仲有好想去日本嘅感覺呀!想喺香港搵日本嘅感覺其實一啲都唔難,今日嚟到由日本人主理嘅Yakitori Kobako,餐廳以日本居酒屋做主打,可以一解思鄉之情。

 

豚肉卷盛合
呢到嘅豚肉串有6種咁多,想一次過試齊6款,就叫個豚肉卷盛合嚟試下啦!雜錦豚肉串啖啖肉,充滿肉汁;平時食開嘅金菇牛肉卷,餐廳改為金菇豚肉卷,豚肉燒得啱啱好,油香十足,絕對可以同金菇牛肉卷平分秋色;車厘茄豚肉卷就夠晒新鮮,豚肉卷吸收咗車厘茄汁,中和咗豬肉嘅油膩感;鵪鶉蛋豚肉卷就令豬肉嘅肉味更加搶鏡。香蔥同蘆筍就做好佢哋蔬菜嘅角色,食咗咁多支串燒,梗係要食番d蔬菜幫助消化啦!

〈好食〉當初相遇時回頭在笑 灣仔Yakitori Kobako

玉子燒、蒲燒鰻魚
玉子燒絕對係易學難精嘅菜式,玉子燒入口嫩滑,仲有濃郁嘅蛋味!而蒲燒鰻魚由日本直送,肉味香濃又無泥味,加埋燒汁真係無得輸,好想叫番碗飯嚟食呀!

 

〈好食〉當初相遇時回頭在笑 灣仔Yakitori Kobako
〈好食〉當初相遇時回頭在笑 灣仔Yakitori Kobako

山盛雞皮串、雞肉棒、雞肝
除咗豚肉,餐牌上見得最多嘅就係雞肉喇!我哋人少少,叫6支串燒選擇就啱晒!雞皮串相當香脆惹味,而且可以點檸檬汁中和雞皮嘅油膩;啖啖肉嘅雞肉棒,入口並不鬆散,而且肉汁保存得好好,伴上生蛋黃,真係好食到要將全部蛋汁蘸得乾乾淨淨;雞肝燒得非常甘香,入口即溶,令人一試難忘。

〈好食〉當初相遇時回頭在笑 灣仔Yakitori Kobako
〈好食〉當初相遇時回頭在笑 灣仔Yakitori Kobako