追韓星絕對唔係少女專利，我身邊嘅阿豬媽（即係A姐）等左兩年幾，終於等到放寬旅遊限制，佢話佢要即刻飛去韓國搵佢嗰啲Oppa喇！為咗隆重慶祝，阿豬媽話梗係要食返餐韓國菜黎慶祝一吓啦！我哋今日就去到佐敦嘅雞哥媽韓國料理，餐廳主打炸雞等韓式地道美食，甚有風味！
甜辣炸雞（一人套餐）
雞哥媽韓國料理嘅炸雞嘅口味有甜辣炸雞、蜜糖芥末炸雞、牛油蜜糖炸雞，鍾意食辣嘅我哋就揀咗甜辣炸雞，味道又甜又辣，雖然辣度唔算好強烈，但就非常惹味。炸雞即叫即炸，脆漿一啲都唔厚，非常脆口，雞肉嫩滑，勁juicy，最正係炸雞無骨，咬落去啖啖肉，令人食唔停口。
牛肉大醬湯（一人套餐）
大醬湯絕對係韓國菜嘅一大代表，大醬湯入面有翠肉瓜、金菇、牛肉、洋蔥、豆腐、蛋花等，味道濃香清甜，熱辣辣嘅大醬湯最正就係加碗白飯，變成飯桶們至愛嘅湯飯啦！
