希慎Food Court係我哋嘅飯堂，因為地點方便之餘，最重要係選擇好多呢！不過，咁多餐廳揀，平時我哋都會出現選擇困難症，但今日我哋目標明確，就係要嚟encore呢間主打泰國菜嘅Chatuchak。
芭堤雅燒雞扒、炸春卷
講起芭堤雅就一定會諗起成街燒雞翼，因為唔想噒骨就叫燒雞扒。雞扒燒到皮脆肉嫩，加上甜甜嘅燒汁，入味又開胃。春卷一啖一件，非常方便。春卷炸得香口，入面嘅材料非常豐富，建議攤凍少少之後，成嚿放入口就最正，因為口感非常豐富呀！
冬陰功豬扒湯麵
麵條掛上冬陰功，而冬陰功湯底酸酸辣辣，加上淡淡椰香，又香濃又有層次，真係可以成碗湯清晒！至於豬扒香口，而店員事前已經幫你切好，食嘅時候夠晒方便。
招牌海南雞飯
食海南雞又點可以唔食雞皮呢！好彩雞皮唔會太肥，減低我嘅罪惡感，至於海南雞嘅肉質非常滑溜，重點係完全無骨，加上醬汁一齊食，就最match！至於油飯好香雞油味，但一啲都唔油。
