每次講起櫻花，唔知你係未同我哋一樣，心中都會哼起：「還記得櫻花正開」呢？嚟到春天就係賞櫻嘅季節，除咗日本、韓國同加拿大之外，其實香港都有唔少地方可以觀賞櫻花㗎，今日我哋就同春天有個約會，嚟到沙田城門河嘅安景街公園，同大家分享賞櫻嘅地址、花期、交通同打卡全攻略啦！
提提你
1. 自己垃圾自己帶走，唔好破壞大自然環境
2. 為咗令更多人都可以賞櫻，所以大家眼看手勿動，千祈唔好採摘櫻花呀
香港櫻花季：觀賞櫻花地點
香港有唔少地方可以賞櫻，包括：將軍澳單車館公園、大埔海濱公園、大埔嘉道理農場、大帽山扶輪公園、長洲關公忠義亭、仲有我哋今次嘅目的地沙田城門河。
前往觀賞沙田城門河櫻花方法
港鐵屯門線石門站C出口，往碧濤花園方向行，大概行10分鐘將會到達安景街公園，櫻花就喺公園嘅城門河邊。
香港櫻花季：櫻花品種
沙田城門河畔嘅櫻花嚟自日本南部，所以勉強都適合喺香港種植，而品種屬於富士櫻，顏色偏粉紅，所以影相打卡好靚。
