為咗慶祝情人節兼我哋嘅7週年紀念日，我哋嚟到香港迪士尼樂園酒店玩staycation，至於午餐就喺翠樂庭餐廳食自助午餐喇！喺迪士尼樂園食自助餐，最大嘅賣點就梗係同迪士尼朋友影相啦！不過，因應依家疫情嚴重咗，呢個環節就被取消，但我哋反而可以好好品嘗呢度嘅美食喇！
海鮮凍食區
食自助餐想回本，當然唔少得海鮮啦！呢度嘅冷盤海鮮有長腳蟹、翡翠螺、蝦等等，但最驚喜嘅係有開邊龍蝦，勁厚肉又鮮甜，仲有唔少蝦膏添，絕對係要瘋狂encore ！
刺身
今日嘅刺身預先切好，想食幾多可以自己隨意攞。選擇有甜蝦、吞拿魚赤身、八爪魚，至於三文魚雖然厚切，望上去都幾肥美，但唔知點解食嘅時候係完全冇味。
熟食熱盤
呢度嘅熟食選擇好多，日式、印度菜、中式同西餐、切肉都有，仲有一個屬於小朋友嘅兒童corner。但我哋最鍾意嘅係，餐廳有唔少即叫即整嘅食物，例如黑松露牛肉意式雲吞、牛肉涮涮鍋、和牛串燒等等。其中牛肉涮涮鍋嘅牛肉好滑溜，肉味又香濃，我哋總共encore咗四次！
甜品
呢度嘅甜品選擇都唔少，大部份都有迪士尼朋友做主題，真係要影相打卡呀！
