每年1月底至2月中都係觀賞吊鐘花嘅最佳時間，所以A姐M佬就襯依家花期，去到位於港島嘅紫羅蘭山觀賞吊鐘花喇！其實香港有多條觀賞吊鐘花嘅行山路線，不過，紫羅蘭山除咗方便，亦相對易行，絕對適合行山新手。另外，紫羅蘭山嘅吊鐘花數量都唔少，出發前一於了解行山路線、觀賞吊鐘花位置、交通詳情等紫羅蘭山嘅行山路線攻略啦！
提提你
1. 紫羅蘭山係香港其中一條合家歡，難度唔高嘅路線，但大家都記住要量力而為
2. 我哋選擇由黃泥涌水塘公園作為起點，不走回頭路，行一個圈再以黃泥涌水塘公園為終點
3. 喺黃泥涌水塘公園設有士多同洗手間，大家可以購買補給品，預備足夠嘅飲用水繼續上山
4. 記住保持環境清潔，自己垃圾自己帶走，絕對唔可以破壞大自然環境
5. 吊鐘花被列為受保護植物，所以大家眼看手勿動，千祈唔好採摘吊鐘花呀
前往紫羅蘭山方法
1. 中環交易廣場巴士總站：乘坐6號、66號新巴，喺黃泥涌水塘公園站落車
2. 銅鑼灣出發：乘坐76號城巴，喺黃泥涌水塘公園站落車
3. 北角出發：乘坐41A號城巴、63號新巴，喺黃泥涌水塘公園站落車
4. 自駕遊：陽明山莊內設有非常少量嘅泊車位，或可泊喺設有時鐘或日泊嘅雅柏苑停車場
紫羅蘭山吊鐘花花期
吊鐘花細細朵，夠晒嬌小玲瓏，好得意架！而且吊鐘花好似懸掛嘅吊鐘，配以粉紅色，不過吊鐘花嘅開花時間比較短，每年一月底至二月中係紫羅蘭山觀賞吊鐘花嘅最佳時間，所以成為期間限定嘅打卡熱點！
紫羅蘭山吊鐘花行山路線起點：黃泥涌水塘公園
詳情：香港唯一休憩水塘 黃泥涌水塘花園
黃泥涌水塘嘅儲水量為2700萬加侖，水壩高50呎，長270呎，係全香港第三個水塘。但隨住多個水塘落成，黃泥涌水塘已改為休閑康樂設施，並提供划艇租用服務。另外，園內嘅水壩同水掣房喺2009年就被列為香港法定古蹟。至於行到水壩嘅盡頭就係紫羅蘭山嘅起步點。
紫羅蘭山吊鐘花行山路線：大潭郊遊徑
離開水壩後大概行1分鐘嘅路程，就會見到分叉路。如果想睇吊鐘花，就記住選擇大潭郊遊徑上紫羅蘭山，唔好選擇紫羅蘭山徑上紫羅蘭山呀！再行大概5分鐘嘅樓梯級，就會見到有一個涼亭。雖然只係起步無耐，但大家可以稍作休息，因為之後都唔會再有涼亭嘅休息位置。離開涼亭之後，就係樓梯嘅上山路線，沿路都有唔少吊鐘花，所以邊行邊影相，行嘅時候完全唔覺得辛苦。
