去茶樓食一盅兩件，係唔少香港人嘅日常。普洱、鐵觀音、壽眉、水仙係茶樓常見嘅茶，勢估唔到喺朗屏，隱藏於工廠區，看似毫不起眼嘅鋒味廚房，食點心竟然配搭非常少見嘅功夫茶。兩個茶壺，一個放有茶葉，另一個係裝住已浸泡嘅茶，令茶嘅味道相對保存一致嘅味道，唔會過濃或過淡啦！
蜜汁叉燒包
飲茶點可以唔叫番籠包食吓呢！呢度嘅叉燒包一如傳統，外皮軟熟，熱辣辣嘅外皮內就係香噴噴嘅蜜汁叉燒，而且餡料份量十足，夠晒足料，非常滋味！
自家醬王鳳爪
呢度嘅鳳爪用上自家醬王，味道極具層次。鳳爪入晒味，非常驚喜。
米鋼脆蝦腸
腸粉外皮用上紅糙米製成，紅噹噹嘅外表非常吸引食慾。軟糯嘅外表加上脆口炸蝦，口感非常特別！加上酸甜醬同喼汁嘅加持，令米鋼脆蝦腸層次更加豐富。
