大帽山係全香港最高嘅山，所以深得行山友喜愛！除此之外，喺山腰都有一間好出名嘅茶寮。無論你係唔係行山友，都可以喺荃灣港鐵站坐巴士或小巴上嚟川龍嘅端記茶樓嘆個早茶。如果你係自駕遊嘅朋友，旁邊仲有少量嘅免費車位畀你泊車添！
端記茶樓採取自助形式，無論餐具、碗筷、點心、熱茶、滾水等，都係自己服務自己。點心嘅種類話多唔多，話少唔少，但當有新鮮出爐嘅點心，店員就會透過廣播，通知茶客。
灼新界西洋菜
西洋菜每日限量供應，據講呢啲係本地新界菜，所以夠晒新鮮，但只限冬天期間供應，而且每日供應唔多。如果見到有嘅，絕對係端記茶樓必食嘅推介！因為西洋菜夠晒鮮甜，真係唔使點落調味，品嚐香港原味道。
呢度仲有多款傳統點心，好似鵪鶉蛋燒賣、臘腸卷， A姐話呢啲點心佢以前完全冇食過，絕對係懷舊嘅滋味。
另外，酒樓常見嘅燒賣、牛柏葉、金錢肚、叉燒包、蒸飯等都有，但如果你係追求點心嘅精緻，呢度絕對提供唔到畀你，因為呢度主要係食環境同人情味，望住大帽山嘅山巒，絕對係端記茶樓嘅全港獨有！
