喺香港擁有獨立平房嘅餐廳唔多，嚟到大埔就有位於白鷺湖嘅Billow。Billow主打多國菜，除咗食物唔錯之外，更吸睛嘅係餐廳以全白色為外觀，充滿南歐風情。背景配上白鷺湖、火車同吐露港，用美景襯托菜式，真係好似去咗旅行咁。今日我哋就約埋朋友P夫婦，嚟到白鷺湖自駕遊兼瘋狂打卡啦！
前往方法
1. 乘坐港鐵至大埔墟站轉的士，車程約10分鐘
2. 乘坐港鐵至大埔墟站轉綠色小巴28K或九巴72、72A、73A及74A，喺翡翠花園/南苑落車，再步行5至10分鐘
3. 自駕遊：提供數十個免費車位，先到先得
我哋喺午餐嘅時段嚟到，午餐選擇非常多，配餐嘅仲有餐湯或沙律，當然仲可以額外加錢，跟埋飲品或甜品，非常豐富。
美國安格斯肉眼 • 烤焗蔬菜
牛扒當然可以選擇生熟程度，我哋今日就揀咗五成熟，廚師控制火候啱啱好！肉眼厚身，外層煎得焦香，鎖住肉汁，夠晒juicy！至於肉質軟腍無筋，牛味香濃。
是日海鮮 • 烤焗蔬菜
今日嘅海鮮就係魚柳，魚皮同魚肉預先調味，加埋醬汁，食嘅時候好有層次。新鮮嘅魚柳肉質非常嫩滑，完全無骨，啖啖肉，好滋味。
牛肉漢堡 • 車打芝士 • 煙肉 • 薯角
呢個漢堡包好大個，重點當然係牛肉漢堡啦！牛肉漢堡非常厚，並手打而成，所以好juicy！搭配蔬菜、車打芝士、煙肉同薯角，想一啖咬落口，確實非常不容易。
慢煮法式豬腩肉 • 蘋果蓉 • 焦糖洋蔥
法式豬腩肉預先切好，一層一層咁加上蘋果蓉同焦糖洋蔥，食得夠方便之餘，仲可以中和整體油膩感。
