大帽山係香港最高嘅山，海拔足足957米，但千祈唔好俾佢嘅高度嚇怕你。因為大帽山全程都係石屎車路，路段相對第二同第三高嘅鳳凰山同大東山更易行，而且坐巴士已經可以到達490米嘅大帽山，如果坐的士或者自駕遊更可以到達700米嘅大帽山，所以要登上香港之巔睇雲海、日落、芒草同打卡真係一啲都唔難！
提提你
1. 由大帽山490米登上700米嘅部份路段可能比較斜，行得比較攰，但因為全程都係石屎車路，所以整體嚟講仍然屬於初級路線，但大家都記住要量力而為
2. 喺大帽山490米嘅扶輪公園或大帽山郊野公園遊客中心，都設有士多同洗手間，大家可以購買補給品，預備足夠嘅飲用水繼續上山
3. 大家記住保持環境清潔，自己垃圾自己帶走，絕對唔可以破壞大自然環境
4. 如果諗住上山睇日落或夜景，沿途無街燈，所以大家記住自備電筒
前往大帽山方法
1. 自駕遊
-喺扶輪公園設有免費嘅停車場
-喺大帽山郊野公園遊客中心亦設有少量免費嘅停車位置，但遊客中心停車場會喺16:30落閘，所以一定要喺落閘前離開
-如果駕駛技術好嘅話，可以直上大帽山嘅700米，但留意番呢度全程單線雙程行車，新牌仔或技術麻麻嘅，我哋就建議你泊喺扶輪公園嘅停車場，再行上嚟啦
2. 的士：可以直上大帽山700米嘅位置，但山上基本上收唔到電話，所以最好約定司機回程時間
3. 巴士：喺荃灣港鐵站或荃灣西港鐵站轉乘九巴51號，喺大帽山郊野公園站落車
大帽山490米 – 扶輪公園
喺大帽山郊野公園巴士站落車，或者喺扶輪公園嘅停車場泊好車，就已經到達海拔490米嘅大帽山。喺扶輪公園最出名嘅就係經營大帽山茶水亭嘅蓮姐，大家除咗可以買定飲品上山之外，茶水亭仲有茶葉蛋、燒賣同魚蛋等熟食，所以上山前，或者落山之後，都可以嚟到稍作補給。
大帽山700米
離開扶輪公園之後，沿住石屎車路一直上山。雖然部份路段會比較斜，行得比較辛苦，但中途都有唔少休息嘅地方，大家可以喺觀景平台遠眺荃灣市區或者錦田平原。嚟到大帽山700米之後，就會見到一個大閘，如果你搭的士上嚟，都要喺大閘前落車。其實喺呢個位置，已經有唔少好靚嘅角度，可以睇到錦田平原、荃灣市區，天氣好嘅時候甚至可以見到青馬大橋同飛機升降添。
大帽山930米
除咗政府指定嘅車輛之外，其他車輛都唔可以通過700米嘅大閘，所以要繼續上山嘅話，就要靠自己雙腳啦！不過呢段路一啲都唔斜，沿路有唔少芒草，大家可以瘋狂打卡影相。一路行仲可以近距離睇到山頂上嘅波波。但到達大帽山嘅930米之後，就會見到一個軍事禁區嘅指示牌，代表我哋已經唔可以再往前行啦！至於呢個軍事禁區用途，政府從未公布，但我哋喺出面睇到唔少宣傳標語：「听党话 跟党走」、「法纪严 风气正」、「忠诚坚毅」、「能打仗 打胜仗」等，但大家留意，呢度係唔可以影相㗎。
