曾被稱為「東方荷里活」嘅香港演藝界，曾經誕生過無數天皇巨星，無論電影、電視劇、電台節目、音樂唱片、舞台劇都喺亞洲舉足輕重。由80年代嘅殿堂級巨星、90年代嘅四大天王、00年代嘅人氣偶像同組合，至近期大熱，席捲全城嘅本土男團 MIRROR，都煥發出一個又一個嘅光芒。想了解香港演藝界嘅娛樂圈歷史同文化，就可以嚟到香港文化博物館嘅全新常設展覽：瞧潮香港60+！
前往方法
港鐵：於屯門線車公廟站A出口，步行約 5 分鐘即可到達香港文化博物館
香港文化博物館
香港文化博物館係全港最大規模嘅博物館，以中國傳統四合院佈局，分為常設展覽廳同專題展覽廳，最多可提供12個唔同類型嘅展覽，另設有一個劇院、商店及餐廳。近期嘅常設展覽分別有：介紹昔日流行玩具嘅兒童探知館、展示金庸武俠小說嘅金庸館、以粵劇為主題嘅粵劇文物館、展出趙少昂與其他當代大師作品嘅趙少昂藝術館、珍藏中國文物及藝術品嘅徐展堂中國藝術館、以李小龍為主題嘅武‧藝‧人生──李小龍等，當然仲有呢個以香港娛樂圈為主題嘅瞧潮香港60+！
中西滙萃熱潮
香港嘅五、六十年代，經濟開始急速成長，當時嘅民間主流娛樂就係粵劇同國語歌舞片！另外，香港人開始接觸到西方流行文化，年青人開始流行舞會派對、英文歌同Band sound文化。
電台
麗的呼聲為香港最早嘅本地電台，設有英、粵、國語等多個播放時段。至50年代中後期，發明咗無線收音機，令電台成為香港嘅主流娛樂，而香港商業電台喺1959年啟播，並以人氣 DJ 打造音樂節目、廣播劇同音樂龍虎榜，令香港樂壇發展更快速，同時殿定電台喺樂壇嘅影響力至今。
電影
港產片係香港重要嘅產業，香港電影多年嚟風靡全球，成為華人文化嘅一大標記，所以有人話「有華人嘅地方，就有香港電影」。香港嘅電影由粵語長片起家，當時主要係音樂劇同黃飛鴻主題嘅功夫電影；至70年代李小龍電影更將香港電影國際化；喺80年代，港產片嘅產量、票房都達到巔峰，電影產值更僅次於美國荷里活，當中最受歡迎嘅就係「許氏兄弟」嘅喜劇電影，其中《半斤八兩》更係七十年代香港最賣座電影。90年代中後期因為盜版、日本電影同韓國電影盛行，令香港電影開始萎縮，只有少數港產電影成功獲得關注，例如：《無間道》。另外，創辦於1982年嘅香港電影金像獎，更加係華語電影嘅指標，喺香港文化博物館就有香港電影金像獎嘅獎座俾大家欣賞喇！
（版權問題，唔可以影相）
流行音樂
香港嘅本土流行音樂可以追溯番70年代，當時電視劇盛行，開始推出大量電視劇主題曲。至80年代就係實力歌手橫行嘅時間，粒粒都係經典巨星，當中合稱「三王一后」嘅譚詠麟、張國榮、陳百強同梅艷芳，更加雄霸樂壇，唱片銷售、演唱會場數屢創高峰；至90年代初，社會愈趨繁榮，成功造就多位樂壇天王天后出現，係本地流行音樂發展嘅巔峰時期，當中四大天王更成就咗香港嘅追星交化，亦開始有偶像派歌手嘅出現；雖然香港樂壇同樣受到盜版同外地音樂衝擊，但千禧年代同樣盛行人氣偶像同組合；至近期大熱，席捲全城嘅本土男團 MIRROR，都煥發出一個又一個嘅光芒。
