壽司郎旺角店開幕　網友：朝早6點已有人排隊

日本迴轉壽司店壽司郎出名「排長龍」，進駐香港後即使不停開分店，但等位時間幾乎都要一個鐘以上。今日壽司郎再有新分店開幕，有網友指清晨6點已經有人開始排隊！

壽司郎早前宣布佐敦店因為大樓重建而暫停營業，不過一眾壽司迷都唔使灰心，因為官方已預告旺角店、坑口店即將開幕，其中旺角店今日起開始試業，8月30日正式營業。

壽司郎嘅魅力可謂即使開到「山旯旮」咁遠，仍會有大批忠粉前往「朝聖」，今次開喺最熱鬧旺角嘅中心地帶，未開幕已有網友講笑指「大概拎左（咗）飛之後一年先入得去食」，預計人流將是歷來最多。

今日旺角店11點半先開門，有網友話清晨6點已經見到有3個人排隊；有人喺10點18分拎飛，都已經要等42張枱；去到大約一點拎已經係336號飛，當時叫號只到124，即係開舖個半鐘已經要排超過200張枱，旺角店果然無令人「失望」！