暑假不知不覺就過咗一大半喇，唔知你哋嘅暑假過成點呢？大家記住要捉緊暑假嘅尾巴，盡情享受假期嘅樂趣呀！位於中環嘅香港摩天輪，今期就喺 AIA Vitality 公園內舉行期間限定嘅嘉年華：「盛夏摩天輪」！場內設有多個機動遊戲、攤位遊戲同多個打卡位。
旋轉木馬
摩天輪旁邊就有一座旋轉木馬，好容易就影到《天國的階梯》主題啦！加上呢度嘅每一隻木馬都由有人手彩繪，全部都係獨一無二㗎！
碰碰車
想要少少刺激感嘅，呢度都有碰碰車，俾大家一展身手。
充氣滑梯、笨豬跳彈床
呢兩款活動就啱晒小朋友瘋狂放電啦！
攤位遊戲
大會預備咗超過30萬隻毛公仔，等大家嚟挑戰！遊戲包括保齡球、掟牛奶樽、射籃球等等（可惜M佬一隻都掟唔中囉）。
夏日打卡公園
摩天輪同旋轉木馬絕對係情侶嘅打卡熱點，加上近期熱播嘅《大叔的愛》，更吸引唔少鏡粉嚟朝聖添！另外，為咗配合今次嘅嘉年華活動，場內設有超過20個嘅巨大造景，包括迷幻大猩猩、邁阿密紅鶴舞池、DISCO 獨角獸及多隻恐龍模型等，啱晒小朋友擺好甫士打卡！
