CP值超高五星 千禧新世界酒店

香港嘅五星級酒店好多，當中唔少都係行氣派奢華路線。至於今個星期嘅Staycation，我同M佬就book咗位於尖東，前稱日航酒店嘅千禧新世界酒店玩番晚。坊間對於千禧新世界酒店staycation嘅介紹唔多，所以喺我出發前可以話係完全無期待。但玩完呢兩日一夜之後，完全覺得物超所值，性價比超高呀！

酒店大堂

酒店位於尖東，距離紅磡站或尖東站約10分鐘步程，交通非常方便；而酒店附近亦有超級市場，同勁多餐廳選擇。如果帶小朋友嚟嘅，不妨順便去埋附近嘅香港歷史博物館同科學館參觀，咁呢個兩日一夜staycation就夠晒行程豐富啦！

前身為日航酒店嘅千禧新世界酒店，仍保留唔少前身嘅設計及建築，酒店實而不華，樓高15層，並提供464間客房及套房。lobby樓底高，雖然欠缺華麗嘅氣派，但空間感十足。至於整個checkin過程非常流暢，櫃檯職員嘅服務親切又帶有笑容。至於平時book完staycation之後，到入住通常都唔記得套票嘅內容，但呢度值得一讚嘅係，職員會詳細講解我哋今次staycation套票所包嘅每一個項目，夠晒細心！

房間區域

我哋今次入住位於12樓嘅聚賢薈城景客房，景觀以附近尖東一帶嘅建築物為主。房間面積為330-390呎，房間面積非常大，空間感十足。雙人床屬於King size，床褥軟硬度適中，而床單非常柔軟，枕頭總共有4個，加上窗簾嘅遮光度十足，令今次嘅入住真係瞓得非常舒服。床嘅兩邊都有房間燈光控制鍵同窗簾控制鍵，臨瞓嘅時候就可以好方便咁熄燈同閂窗簾瞓覺啦！房間內有唔少插頭充電，但只有兩個藍牙喇叭附設嘅USB充電位。

房間嘅書枱以光潔透明嘅玻璃為枱面，位置雖然唔大，但插頭位勁多，啱晒我哋喺度寫吓稿啦！邊度有張梳化同小餐枱，酒店已預先放上歡迎水果，有橙、蘋果同青蘋果。

電視頻道嘅選擇好多，除咗本地電視台，仲有唔少海外嘅衛星節目選擇。如果都係唔啱你心水嘅，酒店仲有自家嘅電影系統，有唔少staycation package都包埋入住期間任睇，電影選擇又多又夠新，我哋呢兩日就煲咗勁多想睇好耐嘅電影喇！