潮流興露營，有唔少人更加chill度玩汽車露營「車中泊」添，但係過夜露營就唔太啱瞓慣床嘅我哋喇！不過，為咗滿足「車中泊」打卡願望，今個weekend我哋就自駕遊，去到大嶼山欣澳石灘，嚟個車尾野餐Picnic，望住個大海野餐真係好relax呀！
提提你
1. 今次嘅目的地係陰澳灣旁邊嘅石灘，大部份行車路線係單線雙程，全長接近一公里，但避車位唔多，有需要倒車讓對頭車，唔建議駕駛技術差同P牌車手前往
2.今次嘅野餐地點其實係馬路上，泊車同野餐時候，記住唔好影響其他駕駛者為大原則
3. 流動洗手間設於欣澳港鐵站外之巴士站
4.大家記住保持環境清潔，自己垃圾自己帶走，絕對唔可以破壞大自然環境
時光隧道
喺Google Map上輸入「欣澳石灘」做目的地，由翔東路入，駕駛大約2.7公里之後，喺司機位嘅左邊路口落斜即到達「時光隧道」入口（提提你：雖然欣澳道就位於石灘旁邊，但係去唔到欣澳石灘）。
呢條隧道漆黑一片，只見隧道出口嘅陽光，吸引唔少廣告喺度取景。
穿過無街燈嘅「時光隧道」之後，繼續沿小路轉右駛即可到達陰澳灣。
