夏天終於嚟到喇！今日嘅溫度雖然好熱，但仍無阻我哋同陽光玩遊戲嘅！不過，行山郊遊最緊要量力而為，為免太熱嘅天氣令A姐發脾氣，所以今次周末郊遊遊就輕輕鬆鬆，用15分鐘挑戰石澳石碑山，打卡check-in夠晒靚，絕對有尋訪瑪雅文明嘅感覺呀！
提提你
1. 今次我哋選擇由石澳道出發，到達無字石碑之後沿路往返，屬於初級路線。山徑大部分為碎石路同草地路，全程基本上無上落坡度，但部份山路被兩旁樹木遮蔽，屬於輕「爆林」路線，記住要小心留意路況，唔好「差錯腳」
2. 如果唔想沿路往返，可以沿山路往下行，去到爛泥灣接駁港島徑，但到達港島徑前都係「爆林」山路，屬於中級路線，只建議給有行山經驗人士及預備定手套同長褲
3. 沿途不設任何洗手間及補給站，記住自備足夠飲品及乾糧
4. 大家記住保持環境清潔，自己垃圾自己帶走，絕對唔可以破壞大自然環境
前往方法
於筲箕灣乘坐9號巴士至歌連臣角落車，沿車路行至入口處，記住小心車輛呀
地政總署石碑山衛星定位站
由入口處起步之後，路段都非常清晰易行，行咗大概5分鐘就會嚟到衛星定位站。但離開定位站之後，餘下嘅10分鐘山路都被兩旁嘅樹木遮蔽。雖然山路坡度唔大，但都要步步為營，小心「差錯腳」。建議大家開住google map留意前進方向，或留意前人留下嘅絲帶標記。
石碑山
經過10分鐘草叢路，就會嚟到高30米嘅石碑，讓人有一種探秘瑪雅文明嘅感覺，記住要打卡啦！
