香港有四大民系，分別係廣府人、客家人、鶴佬人同蜑家人，其中識講客家話嘅香港人更超過25萬人口添。隨住城市嘅發展，香港嘅客家村落大部份集中喺新界，而喺柴灣原來仲有碩果僅存嘅傳統客家民居，我哋一於去到活化後嘅羅屋民俗館，了解本土文化，順便打吓卡啦！
羅屋民俗館
原戶主姓羅，所以活化成為民俗館之後，命名為羅屋。唔講唔知，原來呢間客家村屋已經有二百幾年歷史，喺18世紀初建成，並獲發乾隆三十二年紅印契。喺1976年，市政局決定將羅屋修復並活化成民俗館，至1989年11月10日更成為香港法定古蹟。
羅屋係典型三間兩廊式嘅客家民居，建築布局對稱。對正大門嘅係正廳，中間設有天井，而天井兩旁分別係房間、廚房同雜物房。屋外嘅空地俗稱「禾坪」，係村民曬穀、晾衫同聚會嘅地方。屋內保存咗傢俬、農具、日用品等，等大家可以了解客家民居嘅原面貌。
