銅鑼灣高質壽司丼飯 魚鮮生刺身專門店

17

銅鑼灣登龍街有唔少餐廳選擇,我同M佬每個月總有幾日會嚟呢度搵食!今次就嚟到呢間食日本嘢嘅小店:魚鮮生刺身專門店,魚鮮生堅持食材新鮮直送,所以魚生、刺身同壽司都係非常高質。加上店內嘅和風設計,真係好有日本風情。

高級生鮮壽司定食
壽司定食總共有10件壽司,師傅會視乎每日新鮮食材供應,件件都係魚生級別,絕對唔會有腐皮、玉子同蟹柳㗎。至於我哋今日嘅10件壽司分別係珍寶牡丹蝦、赤貝、帆立貝、拖羅、赤身、
金目鯛、鱲魚、海膽、三文魚籽同炙燒左口魚,件件都夠晒新鮮。拖羅肥美厚身,魚油味重;三文魚籽晶瑩剔透,粒粒飽滿;珍寶牡丹蝦勁大隻,超鮮甜彈;金目鯛肉質纖細,非常清新;火炙左口魚入口即熔,魚油豐富;海膽份量勁多,好甘甜!

〈好食〉銅鑼灣高質壽司丼飯 魚鮮生刺身專門店
〈好食〉銅鑼灣高質壽司丼飯 魚鮮生刺身專門店

鮮活赤珍味丼
至於另一個選擇就揀咗鮮活赤珍味丼,真係好好好好味!丼飯內有活赤貝、帆立貝、廣島蠔、三文魚籽同海膽,刺身份量非常多,特別鍾意活赤貝,新鮮彈牙,超鮮甜;廣島蠔大大隻,蠔身漲滿,勁多汁!不過,就略嫌飯較少喇。

〈好食〉銅鑼灣高質壽司丼飯 魚鮮生刺身專門店
〈好食〉銅鑼灣高質壽司丼飯 魚鮮生刺身專門店

兩款丼飯同定食都附送小食同湯,特別要讚吓個湯一啲都唔馬虎,好鮮甜。

〈好食〉銅鑼灣高質壽司丼飯 魚鮮生刺身專門店