香港人真係好鍾意食米線，所以我哋相信每一區都會有一間米線嘅代表作。繼上次試完屯門在地人介紹嘅雲貴風，今次就輪到住喺灣仔嘅在地人介紹我哋去試試成都小巷。原來成都小巷除咗米線，夜晚仲有雞煲食添㗎！不過，今次午餐嚟到，我哋就先試吓佢哋嘅米線啦！
成都小巷嘅湯底選擇好多，但最驚喜都係佢嘅配料，以灣仔區嚟講，HK$5就有一個配料，價錢真係超抵，而且選擇又多！
M佬之選：雞肉片+蘿蔔麻醬小酸辣米線
米線嘅配菜有芽菜、花生、芝麻、韮菜、酸菜同肉碎，湯底仲有濃香麻醬味，夠晒惹味。而配料方面，M佬就揀咗雞肉片同蘿蔔，兩款都係HK$5，而且份量超多，好抵食！蘿蔔仲新鮮冇渣，夠晒鮮甜。
A姐之選：麻辣腩肉+雞肉片+牛肉片重慶中酸辣米線（走芽菜）
酸辣米線一直都係我嘅最愛，呢碗酸辣米線嘅配菜有芽菜、花生、韮菜、酸菜同肉碎。肉食獸嘅我，一次過叫晒雞、牛、豬，而當中嘅麻辣腩肉係超驚喜，3大塊厚切嘅腩肉，夠晒入味！而雞肉片同牛肉片都各係HK$5，份量超多，好抵食！而湯底酸辣比例啱啱好，正！
