激安抵食石燒 中環滿滿食堂

11

中環食飯俾人嘅感覺就係「貴」,而且食晏時間人多,所以餐廳枱凳逼狹,但今日嚟到中環嘅滿滿食堂食lunch,除咗坐得舒服,仲要係平民價錢,食物質素高,性價比超班,啱晒上班一族嘅你啦!滿滿食堂提供相對平價嘅安格斯到貴價嘅和牛、鮑魚同帶子都有,豐儉由人,甚至連食素嘅朋友都照顧埋,有全素植脂嘅牛扒揀,簡直係照顧周到。

滿滿食堂嘅牛扒同魚嘅份量亦可以自由選擇份量,由最少100g到最多嘅240g,而湯同沙律都係自助式,可以無限添加,無論係雀仔胃定大胃王都啱啦!唔知大家食石板燒,有無試過食到尾嘅時候,塊板已經唔夠熱呢?抵讚嘅係滿滿食堂非常細心,如果食到中段發覺塊石板唔夠熱,可以麻煩店員將石板更換,咁就可以確保所有嘢食熱辣辣啦!

〈好食〉激安抵食石燒 中環滿滿食堂

黑蒜油卜卜蜆
黑蒜味好香呀,勁似某一款公仔麵嘅黑蒜油味,令人回味無窮。鍾意食辣嘅朋友仲可以揀泡菜或者冬陰功味添!至於蜆肉大隻清甜,蜆身飽滿,完全無沙,唔會有好多空殼,非常抵食!

〈好食〉激安抵食石燒 中環滿滿食堂

石燒雞扒加滿滿紫菜飯
厚切嘅雞扒好吸引呀!因為厚身,所以店員會事先將雞扒略為煎熟,先鎖住肉汁,之後再透過石板燒至全熟,唔洗擔心會唔熟或者要燒好耐嘅問題。食嘅時候,雞扒嫩滑多汁,juicy之餘雞皮仲燒到脆卜卜,充滿口感。

〈好食〉激安抵食石燒 中環滿滿食堂

石燒套餐A
套餐A嘅食物有牛肩扒、魷魚、鹹牛脷配滿滿紫菜飯同甜品。牛肩扒生熟度啱啱好,充滿肉汁;魷魚爽口彈牙;鹹牛脷鹹香十足。至於甜品係黑糖布甸,整個石燒套餐份量十足,大胃王都肯定夠曬飽呀!

〈好食〉激安抵食石燒 中環滿滿食堂