精緻細心的西餐 天后On the Spot Cafe Bar Restaurant

18

前排工作關係嚟到天后,同事帶我去On the Spot Cafe Bar Restaurant食lunch,發覺環境同食物都唔錯,所以今日就帶A姐去chill下。雖然已經去過一次,但餐廳嘅入口比較難搵,我哋都行咗唔少冤枉路。所以大家記住係喺琉璃街同電氣道交界個轉角位,先係大廈嘅入口呀!

On the Spot Cafe Bar Restaurant
On the Spot Cafe Bar Restaurant係上年12月開張,所以裝潢仲好新簇,加上環境寬敞舒適,坐得舒服,空間感十足,嚟high tea傾吓計都唔錯。另外,drink menu選擇多,放工同同事黎飲杯酒,都係一個唔錯嘅選擇。而主廚亦好著重客人嘅新鮮感,所以set menu會不時更新,而餐前嘅小食同餐湯都會隨住食材嘅供應而改變。

〈好食〉精緻細心的西餐 天后On the Spot Cafe Bar Restaurant

椰菜花忌廉湯
今日嘅餐湯係椰菜花忌廉湯,椰菜花先用牛油焗過,再打滑而成,配上鬆脆嘅自製麵包粒,餐湯入口綿滑,非常creamy,而麵包粒亦相當鬆脆。」

〈好食〉精緻細心的西餐 天后On the Spot Cafe Bar Restaurant

三文魚籽慕斯撻
前菜係三文魚籽慕斯撻,自製嘅撻皮相當鬆化,加上三文魚籽慕斯嘅咸香,令人十分開胃。

〈好食〉精緻細心的西餐 天后On the Spot Cafe Bar Restaurant

羊臀肉
大部份餐廳都係提供羊架,而On the Spot Cafe Bar Restaurant啱啱更新嘅Menu上面就出現少見嘅羊臀肉。羊臀肉比羊架嘅肉質相對厚實,肉味亦相對濃郁,怕羊酥味嘅朋友可以點少少煙燻乳酪嚟中和番,而羊咩控嘅朋友仔就可以配上牛骨熬製而成嘅燒汁,肉味就會大大提升。除咗主角嘅羊臀肉,伴碟仲有茄子、泰國蘆筍同粟米仔,值得一讚嘅係蘆筍仔相當新鮮幼嫩,而且擺盤亦睇得出主廚有意用顏色嚟營造對比,伴菜用上綠色嘅蘆筍、黃色嘅粟米仔,以白色嘅煙燻乳酪作佈景,含蓄地將食客由伴碟菜引導到主菜,絕對係色香味俱全!

〈好食〉精緻細心的西餐 天后On the Spot Cafe Bar Restaurant