韓風除咗吹襲亞洲各地，其實英國近年都受到韓國文化影響，喺倫敦嘅New Malden就有英國小韓國之稱。喺呢度除咗可以行吓大型嘅韓國超級市場，嘆吓韓式Cafe，仲有一間韓燒放題：K-Town BBQ。K-Town BBQ由年半前每位£20，直至依家已經加價至£29，但仍然人氣高企！不過，餐廳不設預約，想食就要提早排隊啦！
倫敦韓燒放題：時限及收費
K-Town BBQ嘅任食韓燒放題，限時90分鐘，成人每位£29。至於3至9歲嘅小朋友，就按年齡收費，即3歲就£3，6歲就£6，9歲就£9；而10至15歲嘅青少年，就按歲數乘以£1.5，即10歲就£15，15歲就£22.5喇。90分鐘裏面可以任食肉類、壽司、熟食、湯、前菜、水果同雪糕，至於生菜同飲品都要另外收費。
倫敦韓燒放題：前菜
講到韓國嘢食，又點少得泡菜呢，呢度泡菜選擇都有五至六款，非常開胃！
倫敦韓燒放題：肉類
K-Town BBQ嘅肉類選擇有五花腩、雞肉、牛仔骨、大蝦、腸仔、魷魚鬚等等，值得一讚嘅係，所有醃料嘅味道都唔會太鹹，非常惹味！至於大蝦仲會預先起咗蝦頭，食嘅時候就夠晒方便啦！
