粉嶺係一個住宅區，所以呢區嘅餐廳都以街坊美食為主，西餐一向少見。但今日我哋嚟到粉嶺，竟然見到主打西餐嘅Steak Together，價錢仲要係街坊親民價，最估唔到係餐廳佈置用心，喺街坊地區都有一間可以打卡嘅西餐廳，確實驚喜！
南瓜忌廉湯配香草餐包
南瓜湯非常濃郁，啖啖南瓜鮮甜味，仲要勁creamy！香草餐包暖笠笠，配上餐湯，就最match！
黑松露薯蓉
薯蓉唔會打得太爛，反而仲有粒粒薯仔，充滿口感！味道方面，帶有濃郁嘅黑松露味道，呢個前菜我好喜歡！
水牛芝士沙律
嘩！一上枱已經聞到好香芝士味，啲沙律菜新鮮爽脆，可以中和番油膩感。
美國燒排骨
餐廳推介嘅美國燒排骨，當然唔可以錯過啦！不得不讚嘅係佢嘅醬汁分開上，呢個小小嘅細心位令肉唔會過鹹，更唔怕薯條索得太多汁，好味！
紐西蘭法式羊架
羊架肉質軟腍，份量十足！如果可以揀埋肉嘅生熟度就更完美。
