香港歷史深度一天團 香港墳場歷史導賞團

20

我哋曾經去過歐洲嘅墳場參拜名人畫家,其實歐洲啲墳場真係好靚,每個逝者墓地都好似一件藝術品,氣氛雖然莊嚴,卻又非常閒適平和。喺跑馬地就有一個香港少見嘅歐陸式墳場,但嚟到華人社會,大家對於墳場就會有好多避忌,去墳場參觀?「大吉利是」咩!其實每個逝者背後都有一個故事,當中有唔少故事更影響深遠。我哋近期就參加Hidden Gems Travel舉辦嘅銅鑼灣與香港墳場歷史導賞團,認識安葬喺香港嘅歷史人物故事,深度了解香港嘅本土歷史。

行程:
由銅鑼灣維園女皇像開始,途經善樂施大廈,途經回教墳場,途經天主教聖彌額爾墳場,最後到香港墳場。

提提你
1. 今次嘅旅程並唔係探靈之旅,行程以了解前人為香港作出嘅貢獻,認識香港歷史
2. 行程中會參觀唔少墓園及宗教場所,為咗尊重場合及墳場範圍蚊蟲眾多,請唔好著背心、吊帶、短裙、短褲、拖鞋、透視服裝
3. 所有墓園及宗教場所都係一個莊嚴嘅地方,遊覽時注意聲浪,保持應有嘅尊重,唔好騷擾其他人嘅儀式和活動,亦唔好騷擾長眠嘅逝者
4. 尊重自己,尊重宗教
5. 大家記住保持環境清潔,自己垃圾自己帶走
6. 行程以行路為主,所以大家要著得輕便舒適

銅鑼灣維多利亞公園 – 維多利亞女王銅像
行程嘅集合地點位於銅鑼灣嘅維多利亞公園,原來我哋成日經過,喺維園嘅維多利亞女王銅像,最初係設於中環嘅皇后像廣場呀!喺二戰嘅日佔時間,呢個維多利亞女王銅像仲差啲熔掉成為武器嘅原料,所以佢嘅旅程一啲都唔簡單,但幸運地喺1957年重置於新落成嘅維多利亞公園直至依家。亦由呢個故事開始,導遊帶領我哋由銅鑼灣深度了解香港嘅本土歷史。

香港歷史深度一天團 香港墳場歷史導賞團

善樂施大廈(途經)
第二站嚟到善樂施大廈,呢棟大廈又唔係香港最高,又唔係由名建築師設計,咁佢同香港歷史又有咩關係呢?原來善樂施大廈嘅英文名係Zoroastrian,而Zoroastrian就係拜火教嘅意思,大廈雖然經過改建,但5樓仍保留為拜火神廟,喺大廈外牆亦有拜火教標誌㗎!雖然好多香港人可能唔認識拜火教,但其實拜火教歷史悠久,成立比伊斯蘭教更早,係當時中東最有具影響力嘅宗教。直至香港開埠初期,拜火教教徒遷移至香港,亦對香港嘅發展功不可沒。例如捐助15萬元創立香港大學嘅麼地爵士、提出粵劇團男女平等嘅羅旭龢、開辨天星小輪嘅遮打爵士,仲有碧荔、律敦治等等。

香港歷史深度一天團 香港墳場歷史導賞團

回教墳場(途經)
離開善樂施大廈之後,導遊沿路同我哋講解銅鑼灣及四環九約嘅香港歷史,聽吓聽吓就嚟到跑馬地墳場喇!跑馬地嘅英文名稱:Happy Valley,相信大家都好清楚,但Happy Valley原來係暗喻墳場嘅意思,而Happy Valley更加係世界少見位於城市中心,而同時容納多個宗教作比鄰嘅墳場。由最接近銅鑼灣,依次嘅就係回教墳場、天主教墳場、香港墳場、巴斯墳場、印度人墳場同猶太人墳場。

香港歷史深度一天團 香港墳場歷史導賞團

天主教聖彌額爾墳場(途經)
第二個途經嘅墳場就係天主教聖彌額爾墳場,相信呢個天主教聖彌額爾墳場最多人認識嘅應該係門外嘅一副對聯:「今夕吾軀歸故土,他朝君体也相同。」另外,天主教聖彌額爾墳場蘊含大量殖民地歲月痕跡,同歐洲嘅墳場都有幾分相似,墓地以雕像、十字架、聖人、天使為主,莊嚴得嚟又充滿藝術氣息。不過,因為天主教墳場屬於私人地方,導遊只係喺外圍同我哋講解,了解一吓呢度嘅歷史同名人。而喺外觀墳場門口嘅時候,意外發現天使與魔龍嘅雕塑上面出現心心雲,真係好有意思呀!

香港歷史深度一天團 香港墳場歷史導賞團
香港歷史深度一天團 香港墳場歷史導賞團

香港墳場
建立於1845年嘅香港墳場,原來喺1841年就已經有人安葬?呢位住客就係英國軍艦響尾蛇號艦長William Brodie,當年嘅事情,我哋就唔劇透太多,等你哋參加行程嘅時候慢慢發掘啦!而香港墳場曾被稱為Protestant Cemetery(基督新教墳場)、Colonial Cemetery(殖民地墳場)、English Cemetery(英人墳場)等等,但一直以嚟都無中文名稱,主要係因為初期墳場唔歡迎華人,所以華人圈內叫呢個墳場做紅毛墳場,直到1913年先有華人落葬,及後命名為香港墳場。

香港歷史深度一天團 香港墳場歷史導賞團

香港墳場同好多墳場唔一樣,至少絕大部份墓碑都係無相嘅,點解呢?因為有唔少逝者嘅年代久遠,並未有相機,當然仲有好多其他原因,但同樣地等你哋自己發掘啦!

香港歷史深度一天團 香港墳場歷史導賞團

一踏入香港墳場,就會見到建於1845年嘅香港墳場教堂,係香港現存最古老嘅教堂,被列為一級歷史建築,裝飾反映都鐸復興式建築風格,依家主要係進行葬禮等嘅儀式,平時日子,教堂係唔會對外開放。

香港歷史深度一天團 香港墳場歷史導賞團

嚟呢個墳場入面,長眠咗唔少影響香港深遠嘅傳奇人物,其中包括鴉片戰爭時期嘅軍艦響尾蛇號艦長William Brodie、威林馬禮遜醫生、傳教士何顯理、信義宗傳教士郭士立、香港公立教育之父史釗域、德國納粹黨黨員Paul、富商何東及其元配麥秀英等等,導遊都會講解每個人物嘅故事。

香港歷史深度一天團 香港墳場歷史導賞團
香港歷史深度一天團 香港墳場歷史導賞團
香港歷史深度一天團 香港墳場歷史導賞團
香港歷史深度一天團 香港墳場歷史導賞團