踏入12月，香港真係充滿聖誕氣氛，但講到最浪漫嘅聖誕節，當然就係白色聖誕啦！想過白色聖誕唔洗坐飛機嘅，坐火車就得喇！我哋嚟到大埔嘅白鷺湖互動中心，喺聖誕期間，呢度變身成為湖畔聖誕小鎮，除咗有啱晒打卡嘅10米高聖誕樹同聖誕老人之外，仲有攤位遊戲同工作坊，重點當然係飄雪效果啦！即睇十大打卡必玩全攻略，過一個濃厚氣氛嘅聖誕節。
想享受和感受濃郁嘅聖誕氣氛，不如喺白鷺湖嘅餐廳食埋聖誕大餐啦！
前往方法
1. 免費穿梭巴士服務（詳情按此）
2. 乘坐港鐵至大埔墟站轉的士，車程約10分鐘
3. 乘坐港鐵至大埔墟站轉綠色小巴28K或九巴72、72A、73A及74A，喺翡翠花園/南苑落車，再步行5至10分鐘
4. 自駕遊：提供數十個免費車位，先到先得
聖誕打卡點1：聖誕老人
一嚟到白鷺湖互動中心嘅大門口，就俾Billow餐廳上面嘅8米高聖誕老人吸引住，因為佢好似準備爬入煙囪派禮物俾大家呀！但提提大家，唔好嘥太多時間喺呢隻8米高嘅聖誕老人身上，因為入場後，會有另一隻高10米嘅聖誕老人等緊你，佢同樣準備爬入煙囪，真係好cute，絕對要瘋狂打卡呀！
聖誕打卡點2：10米高聖誕樹
喺白鷺湖嘅正中央，就有一棵高10米嘅巨型聖誕樹，夜晚仲會亮燈，真係好靚架！
聖誕打卡點3：聖誕白鷺湖雪橇
如果想近距離欣賞10米高聖誕樹，咁就要玩呢個聖誕白鷺湖雪橇啦！雪橇全程約15至20分鐘，會帶我哋喺白鷺湖遊船河，喺多個最佳角度影相打卡！
聖誕打卡點4：飄雪聖誕樹
全場最多人排隊打卡嘅，絕對係呢棵高6米嘅聖誕樹喇！因為呢度會加入落雪效果，充滿濃厚嘅聖誕氣氛，真係好浪漫呀！值得一讚係，落雪效果好集中，噴雪勁多，仲會積雪添，所以就算用電話都勁容易影到打卡靚相！
聖誕打卡點5：燈飾冰屋
呢間冰屋由好多燈飾組成，最佳嘅打卡位置當然就係冰屋入面嘅韆鞦，真係好靚呀！
聖誕打卡點6：代寄木製明信片
去芬蘭嘅聖誕老人村傳統就係要寄明信片，嚟到白鷺湖湖畔聖誕小鎮，呢度都有提供代寄木製明信片服務，大家不如將聖誕祝福送俾朋友啦！
聖誕打卡點7：聖誕攤位遊戲
除咗影相打卡之外，喺湖畔聖誕小鎮入面仲有唔同嘅攤位遊戲，其中聖誕彩虹同碰碰套樽就啱晒大小朋友玩啦！遊戲當然有一定難度，但試試自己身手，獎品係充滿氣氛嘅聖誕公仔，隻薑餅人真係好得意呀！
聖誕打卡點8：聖誕工作坊
嚟到白鷺湖湖畔聖誕小鎮，鍾意玩吓小手作嘅朋友，呢度亦設有多個工作坊，包括扎染工作坊同大豆香薰蠟燭工作坊，大家可以親手打造一份獨一無二嘅聖誕禮物。
聖誕打卡點9：聖誕小食站
玩到攰攰哋，喺湖邊嘅聖誕小食站就提供多款小食同飲品。呢款水果茶入面就加咗肉桂，令飲品即刻帶有聖誕嘅味道！而朱古力非常香濃，啱晒凍冰冰嘅白色聖誕節！另外，呢款蜜糖炸雞翼係必食必食必食推介，雞翼即叫即炸，非常香口之餘，仲要甜甜蜜蜜，調味一流，勁入味。
聖誕打卡點10：聖誕購物大道
最後，喺白鷺湖湖畔聖誕小鎮仲有唔少攤檔，大家臨走時，可以入手買聖誕禮物俾朋友啦！
