人氣香濃車仔麵 灣仔車仔麵之家

40

喺金鐘返工嘅你,唔知會唔會覺得食lunch係一大難題呢?金鐘嘅餐廳選擇話多唔多,話少唔少,但排隊絕對係一大挑戰!有時唔想等咁耐,買件三文治同杯咖啡,咁就一餐喇!但嚟到冬天,總想食碗熱辣辣嘅麵呢!如果你都有同感,我推介呢間位於金鐘同灣仔交界嘅車仔麵之家,價錢夠晒抵,所以一直都人氣高企。雖然繁忙時間都要排隊,但始終車仔麵夠晒快手。但要留意,店內只有幾個立食位置,人多嘅話不如買外賣返office食啦!

〈好食〉人氣香濃車仔麵 灣仔車仔麵之家
〈好食〉人氣香濃車仔麵 灣仔車仔麵之家

A姐之選:牛腩、甜酸齋、豬紅配小油麵(中辣)
呢度嘅麵底份量分為大、中、小,如果肚餓嘅當然可以叫大size,不過我哋覺得細size就約等於平時食開嘅份量。A姐首推夠晒脆嘅甜酸齋,酸酸甜甜之外,索埋辣嘅湯汁,味道真係好有層次呀!另外,豬紅亦相當唔錯,唔會散又夠滑!

〈好食〉人氣香濃車仔麵 灣仔車仔麵之家

M佬之選:雞翼、冬菇、炸墨魚腐皮卷配小米粉(中辣)
冬菇份量超多呀,而且好入味!炸墨魚腐皮卷炸到脆卜卜,入面仲有粒粒墨魚,係唔錯嘅選擇。雞翼就大大隻,係抵食之選!但記住記住一定要加辣汁,真係好香濃,好好味㗎!