灣仔脫單工程 寶雲道姻緣石

單身嘅你，寂寞嗎？定係愛情路上滿途荊棘？抑或係遇人不淑？等我M佬幫吓你啦！想求一段好姻緣，首先你要好好裝備自己，轉變一下形象，放下自己一啲固執嘅想法。準備好之後，嚟緊週末好去處就去灣仔寶雲道嘅姻緣石，祈求天賜良緣啦！（話說好多字母粉都擔心我同A姐係咪遇上感情危機，放心放心，我哋只係嚟拍拖兼行山同打吓卡咋）

前往姻緣石方法
1. 乘坐15號巴士，喺港安醫院站落車，沿寶雲道健身徑步行約30分鐘
2. 喺灣仔其實有唔少山路，可以上到去寶雲道健身徑，大部份人會經由石水渠街花園對面嘅山路前往寶雲道，沿寶雲道健身徑步行約20分鐘
3. 我哋就選擇聖雅各福群會真光護老之家對面嘅山路上山，上山嘅路段相對較少，沿寶雲道健身徑行2分鐘就到姻緣石

寶雲道健身徑
姻緣石位於香港島嘅寶雲道健身徑內，健身徑全長三公里，沿途平坦易行，可以眺望港九維港景色，吸引市民嚟到散步慢跑，如果幸運嘅，仲可能畀你野生捕獲發哥添！另外，健身徑內亦有唔少健身設施同洗手間，非常方便！

姻緣石
傳說第二次世界大戰結束之後，一位日本軍人同本地女子相戀，但遭到家人強烈反對，所以私奔走到山上，最終化為石頭。之後報夢畀北角一帶嘅婦女，表示會庇佑來拜祭嘅有情人。據說有好多情侶因此締結美滿良緣，非常靈驗。自此越嚟越多人逢農曆初六、十六同二十六日上嚟參拜，「求配偶得配偶；求子嗣得子嗣」。