【Afternoon tea? 即係下午茶囉】

【Afternoon tea? 即係下午茶囉】

呢排係midterm嘅季節，搞到專員都喘不過氣來，連食好西嘅時間都冇啊！考完一科咁岩想去鬆鬆個人，今次就去左elements嘅mango tree，食返個afternoon tea release下d stress囉，舒緩下壓力啊！(JM tone，詳請睇返king jer fb）

聽講mango tree本來推出左個A+B+C嘅tea set，聽聞佢d甜品麻麻地，今次就簡左個以鹹點為主嘅三層架($398 for two)。專員就由中層嘅沙律食先，估唔到個三文魚沙律個汁做得唔錯，酸酸甜甜咁又帶少少水果清新嘅甜味。而個蝦沙律隻蝦好爽口，不過個綠綠地色嘅汁實在太辣啦，搞到專員個口忍受左五分鐘嘅辣的折磨。中層最右邊個個係泰式帶子，冇咩特別，勝在帶子唔會好靱。

去到下層啦，最估唔到係個蒜香大蝦，size大隻之外，個蝦頭先係精華在所，蝦膏配埋蒜味簡直「伊吱棒」啊！不過香茅雞翼放凍哂，味道ok，但質感麻麻。

甜點方面冇抱有太大嘅希望，自然都唔會太失望。講起泰式甜品點少得—芒果糯米飯，芒果幾香甜，但係又係放耐左關係，糯米有d硬。專員覺得餐廳可以試下到食哂成個set先後上，咁樣個quality會好好多。其他兩樣甜品就普普通通，暫且不提。

個set仲包兩杯餐飲，專員就簡左杯coconut treasure，實情就係一杯椰汁冰。佢個椰味唔算好出，但飲落就超級重奶味，唔講仲以為飲緊鮮奶。