當霓虹燈令夜色變暖，今晚最撫慰人心嘅唔係酒精，而係嗰一籠籠熱辣辣，而且好耐無見嘅點心！位於天后嘅滋味點，由早到晚都食到即叫即蒸嘅點心，但除咗常見嘅蝦餃、燒賣，竟然仲有糯米包、鵪鶉蛋燒賣同灌湯餃呢啲回憶系嘅點心呢！
滋味點：香煎蘿蔔糕
咬開蘿蔔糕焦脆嘅外層，瑤柱嘅鮮味就隨即湧出，預設配上甜麻醬、潮州辣椒醬同豆瓣醬，令蘿蔔糕更加惹味。
滋味點：沙嗲金錢肚
食金錢肚最怕就係食擦子膠咁，咬極都咬唔開，滋味點嘅點心師傅就處理得非常好，令金錢肚質感變得軟淋，一咬即開，食落係啖啖嘅沙嗲醬嘅香味，略帶微辣。
滋味點：醬皇蒸鳳爪
鳳爪非常入味，吮落去除咗係濃香嘅醬汁味，骨頭一吮就脫開，食得滋味同時又可以補充骨膠源。
