中環一帶除咗係唔少人嘅返工地獄，但同樣係放工後嘅美食天堂。餐廳除咗走異國風嘅蘇豪，亦有唔少地道食店呢！呢間由韓國家庭主理嘅Aro Korean Restaurant，就將地道嘅韓國家庭料理帶到嚟中環，唔玩花巧，以味道取勝。
魚糕湯
喺香港，掃街就督一串魚蛋；喺韓國，掃街就當然要督一串魚糕。喺Aro Korean Restaurant就唔洗督，一大鍋魚糕湯上枱，勁滿足呢！魚糕爽口，但精髓在於鮮而不鹹嘅鰹魚湯，成碗轉眼間清晒！
雞蛋卷
雞蛋卷入面有煙肉同芝士，外脆內軟嘅狀態仲可以拉絲！加上茄汁、燒汁同沙律醬加持，味道酸酸甜甜，非常開胃。
牛肉大醬湯
韓國嘅湯鍋，絕對係秋冬嘅名物！熱辣辣嘅石鍋上枱，湯底好似火山口咁，滾吓滾吓，係唔少韓國家庭每一餐必備嘅菜式。Aro Korean Restaurant嘅大醬湯可以揀牛肉或豬肉，大醬湯非常香濃，帶有微辛，肉嘅份量十足，送飯一流。
石鍋炸醬麵
嘩，可能係我食過最多配料嘅炸醬麵！薯仔、蘿蔔、洋蔥、豬肉、海鮮，由於佢用石鍋上，所以醬汁唔會黏埋一齊，反而更加容易將拉麵同醬汁攪拌，份量超級大份，幾個人share食都得呢！
