今日去到出名多嘢食嘅西灣河太安樓，見近排天氣凍冰冰，呢間主打馬拉菜嘅馬六就啱晒我心意，因為食完肉骨茶真係好暖胃，這個凍天就不太冷啦！不過，A姐一向都對馬拉菜興趣不大，嫌佢味道太濃，好彩呢間馬六相對淡口味，啱晒鍾意健康嘅香港人。
娘惹小食拼盤
小食拼盤有多種小食，有超鬆化嘅娘惹咖喱角，餡料十足，有薯蓉、雞肉同牛肉，好有口感；雞肉串燒以香料醃製，肉質嫩滑夠晒入味，當然唔少得配上香濃嘅沙嗲醬啦；仲有A姐大愛嘅千絲蝦捲，炸到好香脆，入面有原隻蝦，好彈牙，記住配埋甜酸醬一齊食，好惹味。
馬拉盞通菜
同出面嘅馬拉盞唔同，味道無咁濃烈，但仍不失鹹香味，淡口味人仕都會好鍾意。
無骨海南雞配巴生肉骨茶
無骨海南雞啲雞肉夠嫰滑，重點係唔算肥，連皮食都無好大罪惡感，而雞份量唔少，有脾有胸，飯仲可以揀白飯或椰醬飯或雞油飯，重點當然係醬汁啦，有蒜、酸辣醬同黑醬油，好惹味。而跟餐肉骨茶都有巴生同黑糊椒兩款，我哋一向都鍾意藥材味較重嘅巴生，不過，馬六嘅口味唔會太濃，淡口味人仕都會好鍾意。
新加坡喇沙魚片摻摻
摻摻即係油麵加米粉，配料有豆卜，魚片，流心蛋同魚蛋等等，湯底夠晒椰香，唔錯。
