近期講到去元朗食飯，要數人氣強勁嘅餐廳，一定會諗起摩登牛舌燒肉專門店。餐廳鎮店之寶嘅長龍牛舌，份量長到成隻手臂咁長，絕對係牛舌界嘅天花板。而套餐除咗牛舌之外，仲有牛肋條、豚五花等，夠晒抵食，至於味道方面…
長龍牛舌
作為鎮店之寶嘅長龍牛舌，份量長到成隻手臂咁長，一連22塊嘅厚切牛舌，質感彈牙，燒好之後夾住鹽蔥嚟食，帶出牛舌嘅濃濃牛味。
鳳梨牛肋條
放喺原隻菠蘿上面嘅牛肋條非常吸引，油脂比例啱啱好，至於牛肋條係肋骨之間嘅肉，所以肉味特別濃郁，配上略烤過嘅菠蘿，酸酸甜甜，非常惹味。
厚燒豚五花
最靚嘅豬腩肉絕對可以同牛肉平分秋色，呢度嘅五花肥瘦層次分明，一放落燒網就油香四溢，油脂將豚五花多餘嘅油份迫出，燒到焦香先食就啱啱好。
超大杯鴨屎香手打檸檬茶
食咗咁多豐富嘅燒肉，呢個超大杯鴨屎香手打檸檬茶就絕對啱key！凍檸茶嘅茶味非常香濃，甜度適中，絕對係呢餐飯另一賣點。
