做完成日嘢，就梗係想歎。但港式美食，一向都係快、快、快！如果放工想慢活嘆吓，唔知會唔會諗起一盅兩件呢？嚟到位於荃灣嘅鋿晶館飲夜茶，餐廳師傅曾經喺幾間米芝蓮酒店同大型連鎖酒樓工作，所以對於食物出品總有堅持，最大賣點係點心即點即做，有別於工廠整好再到餐廳翻蒸。
老爺鮮蝦腐皮卷
外皮一咬落去就有清脆嘅「咔嚓」聲，鬆脆爽口加上新鮮又足料嘅餡料，果然真材實料。
脆炸北海道牛奶
炸牛奶呢個懷舊炸物點心絕對係考功夫之作！炸牛奶嘅外皮爽脆而唔會硬巴巴，火侯控制得相當好，而牛奶用上北海道牛奶，入口嘅感覺更幼滑，令口腔充滿牛奶香濃味。
馳名南翔小籠包
小籠包皮薄餡靚就係基本，最精粹嘅係裡面嘅湯汁。一咬開小籠包，源源不絕嘅湯汁就已經留晒出嚟。混合埋半肥瘦嘅豬肉餡，呢個小籠包真係令人食指大動啊！
月半彎晶瑩鮮蝦餃
飲茶又點會唔叫蝦餃，外皮厚薄適中，內層同腐皮卷一樣用上鮮蝦，彈牙好味呀！
黑松露北菇燒賣
師傅亦曾經喺東京嘅富麗華工作，所以敢於嘗試新菜式。呢個燒賣就用上黑松露配上傳統嘅北菇燒賣，多了一份黑松露嘅香味，夠晒驚喜。
