香港雖然係繁盛嘅商業大都會，但其實都有唔少地方嘅光污染較少，適合大家觀星。我哋今日行萬宜水庫東壩嘅時候就順路去埋以天文為主題嘅天文公園，公園內設有唔同嘅觀星設備，就算無任何觀星器材嘅市民都可以輕輕鬆鬆免費到天空去。不過，我哋今次係中午嘅時候嚟到，下次一定要喺萬里無雲嘅夜晚再次到訪。
前往方法
巴士：於港鐵鑽石山站或西貢市中心坐九巴96R至北潭涌落車，再轉乘的士前往
的士：由西貢市中心直接坐的士去天文公園約$80左右
提提你
1. 公園內並無洗手間及補給站，請帶備足夠嘅飲用水前往
2. 大家記住保持環境清潔，自己垃圾自己帶走
3. 天文公園蚊蟲眾多，應做足防蚊措施
天文公園
位於西貢萬宜水庫西霸創興水上活動中心，面積約為1,200平方米，喺2010年1月30日開幕。公園劃分為3個區域：天文研習區、肉眼觀測區及望遠鏡觀測區。
天文研習區
如果日頭嚟，雖然無得觀星，但喺天文研習區就放有8個中國古代天文儀器，分別係渾儀、星晷、月晷、仰儀、圭表、赤道式日晷、地平日晷嘅複製品，仲可以透過人體日晷，讓大家以自己嘅影子對應時間。而喺旁邊嘅涼亭，就有一個模擬人造星空嘅設施。
肉眼觀測區
其實肉眼觀測星星，雖然係最原始，但對比相機或望遠鏡，其實會有更多想像空間。所以喺肉眼觀測區就放有多張斜背觀星座椅，大家可以舒適咁欣賞星空。
望遠鏡觀測區
喺天文公園嘅大門口就設有5個可轉動嘅20×80雙筒望遠、10個望遠鏡柱墩、2個手動赤道儀，無論大家有無自備供自備望遠鏡，都可以輕輕鬆鬆同星海近距離接觸。
