講起九龍西，大家通常都會諗起深水埗，深水埗除咗有大型商場、雜價攤，仲有唔少地道美食。但喺佢隔離嘅荔枝角就好似成日俾人忽視，其實荔枝角都有唔少好嘢食，今次我哋就去咗一間潮食地，潮食地嘅選擇非常多，花多眼亂之下，我哋就叫咗啲小炒，味道唔錯！
例湯
茶餐廳嘅「例水」有中湯同西湯，今日中湯係菜乾湯，勁足料，味道濃郁，絕無味精；西湯係磨菇湯，每啖都有磨菇粒粒，又夠creamy！
冰鎮咕嚕肉
冰鎮咕嚕肉係潮食地嘅推介菜式，將熱辣辣嘅咕嚕肉放喺裝滿冰塊嘅容器上，令咕嚕肉迅速降溫，外冷內熱，而且外脆內軟，形成強烈對比。伴菜仲有菠蘿伴碟，酸酸甜甜，即刻令我想食多碗飯！
金沙黃金四季豆
一上枱就已經聞到濃香嘅鹹蛋黃味，勁邪惡啊！每條四季豆都被鹹蛋黃包住，非常香濃，每條四季豆都鹹香十足，炒得乾身，即刻又令我想食多碗飯！
