係人都知太平山山頂係香港知名嘅旅遊景點，但除咗可以欣賞聞名世界嘅香港景色之外，其實山頂仲有咩玩呢？山頂嘅旅遊景點眾多，本文綜合十一個山頂景點，包括主題公園、博物館、行山郊遊路線，甚至山頂獨有嘅美食，就趁全新嘅第六代山頂纜車即將啟用，不如計劃一個山頂一日遊啦！
山頂交通
1. 自駕遊
咪表：山頂道設有少量咪表停車位
山頂廣場停車場：每小時HK$38（星期一至五任何消費可享3小時免費泊車優惠；星期六、日及公眾假期單一消費滿HK$100或以上可享1小時免費泊車優惠）
2. 山頂纜車
山頂纜車時間：上午7時正至午夜12時正
山頂纜車班次：每15-20分鐘一班
山頂纜車收費：成人單程37港元，來回52港元；小童及長者單程14港元，來回23港元
注：現時山頂纜車正進行翻新工程，暫時停止運作。而第六代山頂纜車預計於2022年夏季啟用
3. 新巴
X15：中環渡輪6號碼頭↔山頂
15：中環渡輪碼頭/交易廣場↔山頂
4. 專線小巴
1：香港站公共運輸交匯處↔山頂
山頂好去處
1. 山頂好去處：太平山山頂凌霄閣摩天台428
上嚟山頂，當然唔可以錯過欣賞世界知名嘅香港日景同夜景啦！喺太平山頂望落去，可以睇到港九維港兩岸嘅高樓大廈，呢個景觀更被稱為世界三大夜景之一。如果天氣好嘅話仲可以睇到獅子山同郵輪碼頭添！但欲窮千里目，就要更上一層樓，提議大家可以去到太平山山頂凌霄閣摩天台428，觀景台位於海拔428米，係全港最高嘅360度觀景台，景觀無遮無擋，非常壯觀廣闊。
地址：山頂山頂道128號
開放時間：星期一至星期五 10:00 – 21:00、星期六、日及公眾假期 08:00 – 21-00
2. 山頂好去處：山頂大富翁夢想世界主題館
A姐成日都話求包養，我就包養唔起佢架喇，所以一於介紹個鑽石王老五俾佢識啦！呢個人住喺山頂，有錢到人人都識，佢就係大富翁喇！位於山頂廣場嘅大富翁夢想世界 Monopoly Dreams Hong Kong 係全球第一個大富翁主題館，裡面有唔同嘅打卡位同娛樂設施，無論一家大細定拍拖去玩都啱晒。
地址：香港山頂道118號山頂廣場3樓301號舖
開放時間：星期一至星期日 10:00 – 20:00
3. 山頂好去處：山頂杜莎夫人蠟像館
山頂杜莎夫人蠟像館有超過100個本地及世界各地嘅名人蠟像，大家可以喺9個主題館，包括魅力香江、樂壇巨星、時尚專區、韓流專區、世界首映、動漫遊戲世界、藝術館、體壇猛將，功夫專區同名人合照，包括：碧咸、李麗珊、楊千嬅、陳慧琳、劉德華、古巨基、梅艷芳、張國榮、Lady Gaga等等，逐個打卡都可以玩足成日啦！
地址：山頂道128號凌霄閣P101號舖香港杜莎夫人蠟像館
開放時間：星期一至星期日 11:00 – 20:00
4. 山頂好去處：山頂花園
原來山頂有一個Secret Garden，唔知你又有無去過呢？呢個Secret Garden就係山頂花園喇！山頂花園前身係香港總督嘅山頂別墅，以英式風格庭園為主題，絕對係周末同拍拖好去處，仲適合大家帶埋毛孩嚟野餐打卡添。
地址：香港太平山柯士甸山道
5. 山頂好去處：柯士甸山遊樂場
山頂花園曾經係總督山頂別墅，而柯士甸山遊樂場就曾經係港督嘅後花園喇！柯士甸山遊樂場都有一大片草地，十分適合大家野餐。另外，柯士甸山遊樂場亦係寵物共享公園，記住帶埋毛孩嚟放電呀！
6. 山頂好去處：西高山
太陽喺西邊落山就係人都知，所以要睇日落就梗係要去香港嘅西邊啦！位於港島西面嘅西高山海拔493.8公尺，係香港島上第四高嘅山峰，可以飽覽港島西岸景色、海岸日落靚景，不過就要挑戰500級樓梯喇！
7. 山頂好去處：盧吉道環迴步行徑
上到嚟山頂，就梗係要睇佢全相啦！講緊嘅全相當然就係維港全景啦！山頂居高臨下，有唔少睇風景嘅check point，其中呢條山頂環迴步行徑就有過百年歷史！更重要係全程以平路為主，輕鬆易行，適合推BB車同長者㗎！
8. 山頂好去處：龍虎山及松林炮台
松林炮台係英軍為咗提防列強入侵香港，而建於海拔307米高嘅龍虎山，係香港最高嘅炮台。直至二次大戰後，松林炮台荒廢。如今成為遊人的景點。
9. 山頂好去處：GO Museum – Cyber X
以元宇宙內一個擁有高端智慧嘅智能系統為主題，利用光與影嘅結合，反複交錯營造出各種未來感十足呡圖案和畫面。雖然面積唔大， 但絕對有玩Team Lab嘅感覺，打卡一流！
地址：GO@Peak Galleria山頂廣場2樓201A
開放時間：星期一至四 11:00 – 18:30、星期五至日及公眾假期 11:00 – 20:00
