網民推「代食麥當勞」服務　助鏡粉換MIRROR貼紙

麥當勞早前聯乘MIRROR推出「鏡仔卡」、「籃神卡」，唔少鏡粉為咗儲卡，食快餐食到喉嚨都痛埋！近日麥當勞再度同MIRROR合作，推出限量版呂爵安（Edan）、盧瀚霆（Anson Lo）同姜濤「世一貼紙」，有網民就趁機推出「代食服務」協助換貼紙，拯救鏡粉喉嚨之餘，自己亦可以慳飯錢。

相關消息：【最後一擊】MIRROR 全員特別版麥當勞閃卡　最高炒至$6888

麥當勞今個月16日起，一連3周推出Edan、Anson Lo、姜濤「世一貼紙」，每人各出3款，合共9款。顧客只要用電子優惠券買套餐，就可獲該周成員限量版貼紙，但唔同款嘅貼紙只能於指定餐廳換到。為節省時間，有人已經喺粉絲群組搵人交換貼紙，希望合作集齊全套。

有網民就趁機會推出「代食麥當勞服務」，表示願意依鏡粉要求食套餐換貼紙，再用套餐原價出售，「你要邊款貼紙同我講，你講我食，原價放卡無炒賣成分」，「互相幫下忙，糧尾好慘呀」，又指聽日最多可以幫6個人食。網上拍賣平台都有賣家提出同類服務，表示會將貼紙包好郵寄畀鏡粉，售價$30「單純賺個食」。代食post一出已有鏡粉留言查詢，睇嚟會接到唔少生意，網民記得飲涼茶清清熱！

Photo／McDonald’s