迪士尼樂園港人限定抽獎　送400張飛兼欣賞交響樂！

迪士尼樂園下個月又有新搞作，首度聯同香港管弦樂團（港樂）呈獻奇妙「奇妙交響夜」。迪士尼今次仲大方送出400張一日門票，等大家免費入場欣賞呢場交響樂盛宴！

「奇妙交響夜」將會喺下個月3號、4號夜晚7:45分舉行，邀請港樂喺奇妙夢想城堡演出，並由著名音樂人趙增熹擔任嘉賓指揮，送畀大家迪士尼經典樂章同聖誕名曲，包括 ”Belle”、”Frozen Heart”、”Joy to the World” 和 ”Jingle Bells” 等。一眾迪士尼人物米奇、米妮、唐老鴨、安娜（Anna）和愛莎（Elsa）等都會一齊參加呢場音樂會。現場嘅燈光同水柱仲會配合音樂舞動，當演出到冬季歌曲時更會飄下「雪花」，齋聽都夠晒聖誕氣氛！

迪士尼宣布送出400張樂園一日門票（指定日期），連同進入觀賞演出預留位置嘅活動手帶（獎品門票）。在2021年11月9至15日期間，只要你持有香港身份證，或香港出世紙連同附相片的本港學校手冊或附相片的有效證明文件，就可以上網登記參加抽獎！得獎名單將會喺 2021年11月19日公布。

呢次抽獎無限年齡，18歲以下參加者須由父母或法定監護人做代表，並登記有關人士父母或法定監護人真實及準確的電郵地址。所以一眾爸爸媽媽都可以幫小朋友報名參加，增加中獎機會。但要留意16歲以下得獎者，要由一位持有效門票或會籍（年證）並年滿16歲人士陪同先可以進入樂園。

不過如果咁好彩中獎，都係贏到1張門票，同行嘅朋友都要另外買飛或有年證先可以入場。同埋中咗獎都要喺去迪士尼前14日內，預先到樂園官方網頁預約入場。