行維港海旁除咗睇燈飾夜景，依家仲有期間限定嘅藝術作品呀，所以趁嚟緊嘅weekend同公眾假期就帶A姐去打卡影相啦！今次活動由旅遊事務署呈獻、香港設計中心主辦，以「維港蛻變」為主題，由銅鑼灣避風塘起步至中環海濱，共有7個大型藝術裝置，令維港海旁突然變成露天城區設計廊，每一件作品都可以接觸互動，讓公眾與藝術共融。
首@銅鑼灣避風塘海濱
作為「維港蛻變」嘅起點，故命名為《首》。以傳統嘅大坑舞火龍為設計理念，寓意平安同吉祥。另外，選擇將作品放喺銅鑼灣避風塘，原來係因為舞火龍傳統儀式過後，就會嚟到呢度，將火龍、花燈同頭牌等東西拋入海中，以示「龍歸滄海」。至於呢個作品，以珍珠草紮成龍首並插上長壽香，將火龍重現，打卡影相好靚㗎！
喺《首》喺旁邊，除咗設有寓意火龍盤踞意象嘅龍珠，而龍珠亦同時融合另一個展品：《一齊一個人》。設計師因為疫情期間，以「一齊」但又「一個人」為創意靈感，好似氹氹轉、音樂亭、搖搖板都可以喺一個人嘅時光，但其實我係同A姐一齊，幫佢影相打卡。
聲之穹蒼@灣仔水上運動及康樂主題區
由高4.5米、闊3米長，合共12道嘅充氣門，形成一個大型嘅裝置。《聲之穹蒼》加入咗擴音器，聽到從香港唔同角落收集到嘅聲音。影相嘅時候，不妨以維港做背景，透過拱門營造出嚟嘅效果，真係好似去咗希臘啲白色小屋呀！另外，作品原來亦裝上LED燈，夜晚嘅時候會亮燈，成個感覺即刻唔同晒！
川流不熄@中環海濱活動空間
《川流不熄》 係今次活動中最大型嘅作品，全長80米，由超過45,000條色帶組成，形成空中之河，隨風飄揚。藝術家表示呢條空中之河其實同維港十分相似，展現無盡生機而且亦有未來延展嘅無盡可能，與銅鑼灣避風塘嘅《首》作首尾呼應。絕對係必影嘅打卡熱點！
