午餐飯堂及斬料好選擇 中環新德興陳皮燒鵝

燒味飯可以話係港式嘅代表，所以每次去完長途旅行回港後，我都要去嘆番碟燒味飯，慰藉一下假期後遺症。嚟到位於中環嘅新德興陳皮燒鵝，顧名思義，餐廳以陳皮燒鵝作賣點，而吸引我嘅，當然係掛喺櫥窗嘅燒鴨、油雞、叉燒、燒腩仔等，全部都閃令令，望落好好味呀！

新德興陳皮燒鵝：乳豬五寶飯

新德興陳皮燒鵝嘅乳豬五寶飯有驚喜！首先佢哋唔係求求其其搭啲紅腸或雞翼就當一寶，而係曬你冷！除咗乳豬，仲有切雞、乳豬、叉燒、燒腩仔同鹹蛋，夠晒豐富。最正嘅當然係薄脆香口嘅乳豬豬皮啦，乳豬嘅肉質非常嫩滑，口感一流；而切雞嘅肉質滑溜，雞有雞味；叉燒夠軟腍，邊位略帶焦脆；仲有一層肥一層瘦嘅五花腩製成嘅燒腩仔，真係每一寶都非常出色。

新德興陳皮燒鵝：鵝髀雙拼飯

顧名思義，餐廳嘅陳皮燒鵝，當然係名物啦！燒鵝皮香脆而鵝油豐富，豐盈卻唔會過於油膩。至於鵝肉帶有陣陣陳皮嘅清香，極具層次；配上肥叉作為雙拼組合，肉質另具豬油嘅油香，肉質更軟腍，所以話識食梗係食新德興陳皮燒鵝嘅肥叉。