每次旅行完，踏足機場一刻都會有一種失落感。失落無得放肆地食，失落無得影相打卡，所以為咗平衡番自己嘅心態，梗係要揾間靚靚嘅打卡餐廳調劑一吓！嚟到位於銅鑼灣嘅Bingo & Cook，餐廳由韓國人主理嘅韓國料理餐廳，加上餐廳化身為韓國大排檔，加上店員嘅韓文，真係充滿旅行嘅感覺啊！
豬腳
豬腳預先切片，食起嚟夠晒方便，非常細心。而且豬腳嘅外皮燒到啡紅色，一層瘦又一層肥，肉質非常嫩滑；而且豬腳仲有唔少骨膠原，食嘅時候可以用生菜包住嚟食，減輕油膩感，增加整道菜嘅口感呢！
部隊鍋
部隊鍋嘅材料好豐富，有泡菜、魚糕、腸仔、餐肉、年糕、魚蛋、即食麵等，份量多到2個人都真係食唔晒！特別鍾意佢哋嘅部隊鍋湯底，相信係自家調味，因為完全唔似辛拉麵嗰包味精湯，湯底微辣，食材索晒湯夠惹味；最鍾意當然係煙煙韌韌嘅韓式年糕，勁掛湯，好好味呀！
