近期睇緊人氣烹飪節目，韓國嘅美食真係睇到我哋舔舔脷！但如果節目喺泰國搞，你又會諗起咩菜式呢？由前酒店主廚主理嘅孖女廚房泰好味，就以地道泰菜為賣點，而餐廳選址長沙灣，價錢夠晒親民抵食！
泰式辣椒膏炒魷魚
千祈唔好俾泰式辣椒膏呢個名嚇親，泰式辣椒膏味道唔算太辣，仲略帶微甜，加上洋蔥同青椒嘅味道加持，令醬汁層次大大提升。重點當然係新鮮嘅魷魚，口感夠晒彈牙又入味。
冬陰功海鮮湯
呢個細size嘅冬陰功，份量十足，兩至三個人食都會好滿足！冬陰功味道濃郁，酸酸辣辣嘅比例啱啱好，大蝦新鮮彈牙，亦為湯底加添鮮甜味！
泰式燒雞
燒雞外脆內嫩，火候時間拿捏得非常好，外皮燒到脆卜卜微焦，但肉質仍保持得夠juicy，可見師傅燒烤功夫了得。食嘅時候加上泰式甜酸醬或者辣椒豉油，大大提升味道嘅層次！
