食日本菜、意大利菜、西班牙菜等各國菜式，後面都唔會配上「大餐」呢個詞；唯獨優雅精緻嘅法國菜，就評譽為法國大餐，代表世界頂尖嘅菜餚。但看似遙不可及嘅法國大餐，其實都有相對親民價嘅選擇！今次嚟到中環嘅La Brasserie，午餐有2道前菜，配搭1道主菜及甜品，抵食又好味！加上餐廳高雅嘅設計，讓你投入細膩嘅法式美味。
Tartare de Boeuf
牛肉他他可以話係法國菜嘅經典菜式之一。La Brasserie嘅Tartare de Boeuf，混合咗唔同香料，令肉味香濃之外，仲非常嫩滑，放上脆薄多士上一齊食，兩種口感，充滿層次。
Les Huitres
法國盛產生蠔，所以法國大餐當然唔少得蠔啦。蠔身大大隻，即叫即炸，炸皮唔厚夠香脆，上面放有蛋黃醬調味。
Tataki de Thon
午餐嘅前菜，選擇非常多，當中Tataki de Thon絕對係必點之選！呑拿魚四邊炙燒，中間保持生嘅狀態，令呑拿魚自身已帶有兩種口感，而且新鮮嫩滑。呑拿魚上放有蘿蔔、青瓜、芒果莎莎醬和紫蘇葉醬，成件事變得非常青新開胃。
Rillette de Saumon
米餅嘅擺盤好似雲朵，口感香脆，食嘅時候當然要加上自家製嘅三文魚醬。三文魚醬非常creamy，巧妙地加入小香葱，令濃厚嘅醬變得清新，亦令味道加添了層次。
Salade Niçoise
香港人嘅小食前菜，雞翼係最常見嘅選擇；至於西餐嘅小食前菜，又點少得沙律呢？呢個沙律用生菜包住低溫烹調嘅赤海鮪魚，加上橄欖、蕃茄、及嚟自南法嘅尼斯配料和柑橘醬，非常新鮮開胃。
Gratin d’escargots
講到法國菜，有點少得法式蝸牛呢！法式蝸牛新鮮軟腍，完全無泥味。但每次食法式蝸牛，個重點自然會落咗去個薯蓉度。餐廳以整個烘鍋烤焗，所以薯蓉吸收晒全部精華，又香又滑。
Beignet de Crab
炸到成個小饅頭咁，原來大有乾坤。絲絲嘅蟹肉點上法式蛋黃醬，脆口又惹味。
Bahn Mi
前菜小食除咗法式嘅傳統選擇，仲有越式嘅法包！法包大大隻，麵包香脆鬆口，餡料有以雞肝醬配上雞肉絲、醃菜和新鮮蔬菜，口感豐富！
Entrecote
我哋4個人，share食咗8個前菜小食之後，已經非常滿足，但其實主菜先啱啱登場。呢份牛扒採肉眼部位，肉味香濃，油香豐富，生熟度啱啱好。至於配菜就有鋪面嘅炸幼薯條，比平時食開嘅薯條更香脆，超好味！
Loup de Mer
已去骨嘅鱸魚啖啖肉，加上以烤焗煮法，帶有焦香味，亦令魚皮非常香脆。主廚特意唔用香濃嘅醬汁，並以欖欖油、蕃茄、小香葱等適量調味，更突顯鱸魚嘅鮮甜味。
Gambas
上碟大蝦有兩大隻，肉質彈牙，蝦頭帶有大量蝦膏，非常鮮甜。餐廳特意用上芒果同紅椒，除咗就令菜式嘅顏色更添豐富，攞盤精美之外，亦可減低油膩感，配搭得宜。
