從前香港嘅大排檔冬菇亭都上晒樓，搬晒去市政大樓嘅熟食中心，所以熟食中心內有唔少餐廳臥虎藏龍。今日我同M佬繼續尋找好味嘅沙嗲牛肉麵，嚟到堅尼地城士美菲路熟食中心嘅誠記，呢度嘅沙牛麵值得推介。
沙嗲牛肉太陽蛋麵
最欣賞嘅係加入左沙嗲嘅湯底唔會變得好杰，但沙嗲味仍然濃郁，微甜而帶有淡淡花生香味，不過牛肉份量唔算多亦無乜味。另外，非常欣賞佢嘅湯底夠晒熱，公仔麵軟硬度適中。
乾炒豬扒意粉
意粉即叫即炒，條條意粉都上晒豉油皇嘅味道，炒得非常乾身有鑊氣。豬扒份量唔少，不過其中兩舊就係連骨嘅豬扒，唔可以啖啖肉喇。
