紅磡有唔少臥虎藏龍嘅餐廳，所以不時都會為味覺帶嚟驚喜！今次嘅驚喜嚟自一間小店：泰好食，餐廳顧名思義主打泰國菜，並由泰國人主理，味道夠晒正宗，而且相對九龍城嘅泰國菜，價錢更親民，性價比高。不過，餐廳位置唔多，遇上繁忙時間，可能要等等喇！
酸辣去骨鳳爪
小食揀咗酸辣去骨鳳爪，醬汁嘅酸比辣度強，非常醒胃，唔食辣都食得。鳳爪彈牙，索晒醬汁，好入味呢！
飛天通菜
切半嘅通菜，新鮮爽口，另加上蒜蓉和同指天椒，非常惹味。
冬陰公湯河
冬陰公湯底酸酸辣辣，加上陣陣嘅香茅味，充滿層次。入口初時嘅辣度以為唔辣，但原來後勁十足，加上河粉索湯，味道唔錯呢！
泰式海南雞飯
海南雞飯相信係餐廳嘅招牌，因為無論外賣定堂食，都勁多人叫呢！海南雞一樣係完全無骨，雞肉偏瘦令人食落無負擔，但肉質依然嫩滑。跟飯仲有一碗雞湯，可惜今日嘅油飯已經售罄，否則更為完美。
龍眼冰、泰式奶茶
講到泰式飲品，點少得龍眼冰同泰式奶茶。龍眼冰非常清甜，解喝又清新；泰式奶茶非常香濃，奶香潤滑。
