啱口味嘅意式風情 大角咀MACROONIES

13

大角咀係近年新興嘅搵食聚會熱點,區內有唔少街坊小店、打卡文青Cafe,而且隔一段時間嚟到,都會見到新店開張,選擇夠晒多。今次嚟到以意大利為主嘅西餐多國菜MACROONIES,餐廳價錢親民,味道仲要勁啱口味,係CP值高嘅驚喜選擇。

自家秘制雞翼
用上秘制嘅腌料再將雞翼生炸,落完order即刻炸,所以新鮮炸起嘅雞翼夠晒熱辣辣,而且金黃色嘅脆皮鎖住juicy嘅肉汁,值得推介。

〈好食〉啱口味嘅意式風情 大角咀MACROONIES

蕃茄羅勒水牛芝士薄餅
兩個人想食薄餅,又驚太大塊?MACROONIES嘅薄餅只有8寸,兩個人食啱啱好,如果多人嘅話,更加可以叫多幾款齊齊share!呢個蕃茄羅勒水牛芝士薄餅,上面鋪滿好多火箭菜同一層厚厚嘅水牛芝士,加上酸酸甜甜嘅蕃茄醬,味道啱啱好,唔會太溜。至於薄餅係薄批,脆卜卜非常滋味。

〈好食〉啱口味嘅意式風情 大角咀MACROONIES

真卡邦尼意粉
原來真同假嘅分別,在於醬汁上!正宗嘅卡邦尼意粉係唔落忌廉,只係以蛋黃打成醬汁,再加上芝士同埋煙肉粒,味道非常creamy,但又唔會令人覺得好油膩。

〈好食〉啱口味嘅意式風情 大角咀MACROONIES

烤美國肉眼扒(8安士)
店員推介五成熟,上枱嘅時候,肉眼扒大大塊,肉味香濃,至於肉質軟腍,配上芥辣醬一齊食,可以更加帶出牛扒香味!

〈好食〉啱口味嘅意式風情 大角咀MACROONIES

意式芝士蛋糕
Tiramisu係餐廳嘅名物,當然要留肚食甜品啦!當用叉一吉落去個下,就已經聞到蛋糕滲出香濃嘅咖啡酒,放入口除咗有酒香之餘,仲會有甘香嘅可可粉,配埋甜甜嘅士多啤梨,可以中和返酒同可可嘅苦澀味,極具層次。

〈好食〉啱口味嘅意式風情 大角咀MACROONIES