隱世驚喜代名詞 荔枝角壽定食屋

10

荔枝角係香港嘅工業區,之但係工業區除咗男人的浪漫,仲有實惠高質嘅和式料理呢!位於荔枝角工業中心地庫美食廣場嘅壽定食屋,雖然位置隱世,但餐廳出品用心有驚喜,加上價錢經濟實惠,深受附近街坊及打工仔喜愛呢!

日本鹽昆布土佐汁椰菜沙律
飲食均衡當然食返碟菜嚟平衡下,雖然呢個沙律技巧唔多,但醬汁方面都感受到店家下咗心思。店家用咗比較少見嘅鹽昆布,加上帶甜嘅土佐汁作為調味,令到平平無奇嘅椰菜沙律變得驚喜萬分。

〈好食〉隱世驚喜代名詞 荔枝角壽定食屋

日式煮蘿蔔
越簡單嘅食材先越顯示到店家嘅真本領!日式煮蘿蔔雖然係一道日本常見嘅家常餸,但餐廳製作亦不馬虎。相信蘿蔔用咗唔少時間烹調,所以煮得非常入味又清甜。

〈好食〉隱世驚喜代名詞 荔枝角壽定食屋

日式厚切吉列黑豚豬扒湯烏冬
吉列黑豚豬扒炸到外皮鬆脆,而豬扒雖然帶有一層脂肪,但食落去唔會太油膩,反而令肉質保持鮮嫩,夠晒juicy。至於烏冬嘅湯底用上豬骨,再經過六小時熬製,湯底非常香甜。最後,讚岐烏冬夠晒滑溜。

〈好食〉隱世驚喜代名詞 荔枝角壽定食屋

南國元氣唐揚炸雞定食
唐揚炸雞嘅炸漿非常薄身,只係輕輕包住雞肉,但仍然非常香脆,而雞肉炸完後依然保持嫩滑,夠晒juicy!而每個定食都會有兩款前菜附送,而今日嘅前菜竟然係主菜常見嘅天婦羅!天婦羅茄子同天婦羅秋葵,炸到金黃色,非常香口,誠意十足。

〈好食〉隱世驚喜代名詞 荔枝角壽定食屋